Здружението за едукација и тренинг ЦЕТ ПЛАТФОРМА Скопје објавува отворен повик за 5 млади учесници и 1 лидер на група за Еразмус+ младинска размена (youth exchange) „Active Youth”, која ќе се одржи во Тарговиште, Романија од 20-ти до 29-ти ноември 2022 година.
Нашите заедници и општество стануваат поправедни и инклузивни кога сите луѓе — индивидуално и колективно — се вклучуваат и преземаат акција, кога дејствуваат како активни граѓани. Една од причините да се фокусираме на младинскиот граѓански ангажман е тоа што таквото учество во животот во заедницата е навика и може да се развие: рано започнување може да формира навика за граѓанско ангажирање што ќе трае цел живот.
Кога сите млади ќе развијат здрави граѓански навики, вештини и обврски, нашите заедници ќе станат поинклузивни и потолерантни, место каде што сите млади ќе можат да најдат соодветно место за личен и професионален развој. Поради тоа, главната цел на проектот е да се зголеми ангажманот на младите во заедницата преку промовирање на младинско учество, активно граѓанство, инклузија и различност.
На младинската размена ќе учествуваат 39 млади и младински лидери од Македонија, Романија, Чешка, Грција, Италија, Литванија и Турција.
Услови за учество:
- Групниот лидер треба да е постар од 25 година и има претходно искуство со младинска работа и неформално образование
- Учесниците треба да се на возраст од 18 до 28 години без потреба за претходно искуство
- Способност за добра комуникација на англиски јазик кој е работен јазик за време на младинската размена
- Мотивираност и подготвеност за учество во сите активности на младинската размена
- Согласност да се почитуваат сите правила за проектот поставени од организаторите
- Пасош кој има уште минимум 6 месеци важност од почетниот датум на проектот (потребно за патување)
Сите трошоци за сместување и храна, како и патните трошоци (до 210€) се целосно покриени од организаторите. Учесниците ќе мора да патуваат со автобус, воз или приватно возило до местото на одржување на проектот, според правилото „Green Travel“ на програмата Еразмус+.
Одбраните учесници ќе треба да уплатат 1000 денари на сметката на ЦЕТ платформа како котизација за учество што ги покрива оперативните, административните и подготвителните активности на здружението поврзани со испраќањете на проектот.
Доколку сте заинтересирани да учествувате на размената, најпрво внимателно прочитајте го инфопакот за проектот, па потоа пополнете го апликациониот формулар. Ве молиме да аплицирате само доколку сте 100% сигурни дека сте слободни да патувате и учествувате на проектните активности за време на планираните дати!
Доколку имате прашање или нејаснотии, контактирајте не на [email protected] со назнака (subject) „Размена во Романија“.
