Асоцијацијата за едукација и тренинг ЦЕТ платформа од Скопје има чест да Ве покани да земете учество на почетниот настан за проектот „Здружени за посилно граѓанско општество“, кој ќе се одржи на 16-ти февруари 2019 (сабота) од 11 часот во Мултимедијалниот центар „Мала станица“ во Скопје.
Цел на настанот е преку презентација на проектот и неговите активности да се поттикне соработката на полето на развој на граѓанското општество и младинско учество преку обуки за граѓански организации и млади за користење на регионални и европски програми кои им се достапни. При тоа, тимот на проектот ќе ги претстави основните елементи на проектот, неговите цели и ќе ги најави наредните активности.
Во рамки на настанот ќе бидат организирани активности за запознавање на учесниците и дискусија за проблемите и пречките на граѓанските организации и младите во користењето на локални, регионални и европски програми.
Предвидено е настанот да трае 4 часа, при што ќе бидат поканети преставници на граѓанскиот сектор, членови на граѓански организации и заинтересирани млади лица.
Агендата на настанот е во прилог, а заради ограничениот број на места Ве молиме учеството да го потврдите преку пополнување на формуларот за регистрација или по е-пошта на [email protected].
Проектот е поддржан од Агенцијата за млади и спорт.
