Еразмус+ Младинската размена во Крушево инспирираше промена на однесувањето кај 37 млади луѓе и младински лидери од 6 европски земји кон поодржливи животни стилови и поттикна чувство на колективна одговорност за здравјето на планетата.
Од 21-ви до 28-ми октомври 2024 година, ЦЕТ ПЛАТФОРМА Скопје беше домаќин на Еразмус+ Младинската размена „Eco(logical) Youth“ во Крушево. Младинската размена на едно место донесе 37 млади луѓе и младински лидери од Македонија, Бугарија, Хрватска, Грција, Србија и Романија за да разговараат за итни еколошки прашања, да ја поттикнат соработката меѓу младите и да инспирираат колективна акција.
Во текот на една недела, учесниците истражуваа и навлегоа подлабоко во темите за заштита на животната средина, одржливиот развој, рециклирањето, загадувањето и биодиверзитетот. Преку интерактивни работилници, игри, креативни активности, дискусии, дебати, активности на отворено и други методи на неформално и искуствено учење, учесниците успеаја да ги прошират своите хоризонти, да ги отворат своите умови и да го збогатат својот живот. Учесниците научија повеќе за тоа како да ја ценат и негуваат животната средина и биолошката разновидност, да го користат отпадот за создавање корисни и креативни предмети, да прават акции за еколошки прашања и што е најважно, создадоа нови врски и пријателства кои ќе траат доживотно.
Деновите што ги поминавме заедно во Крушево беа исполнети со смеа, позитивност, континуирана меѓу-врсничка размена на идеи и силно интеркултурно учење. Учесниците меѓусебно се учеа за нивните земји и богати култури, како и за традиционалната храна, танци и музика. Тие, исто така, научија како да размислуваат и да ги документираат нивните емоции и учење преку секојдневно пишување на дневник на креативен начин.
Покрај учењето нови работи, учесниците добија и можност практично да ги искористат своите стекнати и подобрени компетенции преку подготовка и спроведување на кампања во центарот на Крушево каде што ги споделија резултатите од младинската размена и ја покажаа својата креативност. Дополнително, тие развија планови за последователни активности што ќе ги спроведат назад во своите земји, кои ќе имаат за цел да ја промовираат заштитата на животната средина, одржливиот начин на живот, интеркултурното учење и програмата Еразмус+.
Оваа богата недела во Крушево на учесниците им одржа вредни лекции и им овозможи радосни искуства и нови авантури кои ќе останат со нив засекогаш. Младинската размена ги потсети дека се силни, способни, ценети, одговорни и никогаш сами во потрагата по подобар свет.
За повеќе детали за активностите на Младинска размена, посетете ја веб-страницата на проектот: https://ey.cetplatform.mk
Проектот е финансиран од програмата Еразмус+ на Европската Унија преку Клучната акција 1: Проекти за мобилност на млади – „Младински размени“ и доделен од Македонската Национална Агенција за европски образовни програми и мобилност.
Проектот се спроведе во соработка со партнерските организации: International Youth Activity Center (Бугарија), Civilna, edukativna i transparentna platforma (Хрватска), Civil Education & Training Platform – Hellas (Грција), Asociatia Oportunitati de Dezvoltare prin Educatie si Sport (Романија) и Razvojni Centar za Mlade (Србија).
